Lufta/ Kreu i ushtrisë ukrainase: Situata në front është përkeqësuar, rusët kanë suksese taktike! Sulme në Sumy, qindra shpërthime

Komandanti i përgjithshëm i ushtrisë Ukrainase, Oleksandr Syrsky ka thënë se situata në vijën e frontit është përkeqësuar përballë sulmeve të shumta ruse.

Oleksandr Syrskyi tha se forcat ukrainase ishin tërhequr nga pozicionet në rajonin lindor të Donetskut.

“Situata në front është përkeqësuar, trupat ruse kanë arritur suksese taktike në disa fusha. Rusia po sulmon në mënyrë aktive përgjatë gjithë vijës së frontit, duke arritur suksese taktike në disa zona", tha Syrsky në Facebook.

Rusia ka kërcënuar Perëndimin se do të përgjigjet “ashpër”, në rast se asetet e ngrira ruse konfiskohen, duke u zotuar për masa hakmarrëse dhe veprime ligjore “pafund”.

Zëdhënësja e Ministrisë së Jashtme të Rusisë, Maria Zakharova, tha se Rusia nuk do t’i dorëzojë kurrë territoret që ia ka uzurpuar Ukrainës, në këmbim të kthimit të aseteve të ngrira ruse.

“Mëmëdheu ynë nuk është në shitje. Asetet ruse duhet të mbesin të paprekura, sepse, përndryshe do të ketë përgjigje të ashpër ndaj hajdutërisë së Perëndimit. Në Perëndim ka shumë që e kanë kuptuar këtë, por jo të gjithë fatkeqësisht", shkroi Zakharova në Telegram.

"Terrori rus ekziston vetëm sepse ne kemi më pak armë dhe zgjidhje për të mbrojtur jetën, sesa Rusia ka kapacitetet për të shkatërruar.

Të gjithë e dinë se sa efektivë janë sistemet e mbrojtjes ajrore Patriot, IRIS-T, NASAMS, Hawk dhe sisteme të tjera moderne të mbrojtjes ajrore .

Ne kemi nevojë për ato këtu në Ukrainë: në Kharkiv, Dnipro, Odesa, Mykolaiv, Kherson, Donbas dhe qytete të tjera që vuajnë nga sulmet ruse”, ka shkruar në Telegram presidenti i Ukrainës, Volodymyr Zelensky.

“Çdo lider, çdo shtet, çdo ambasador që na ndihmon me mbrojtjen ajrore tani  nuk është vetëm një shpëtimtar, por edhe dikush që zvogëlon tundimin rus për luftë.

Sa më pak të arrijë Kremlini përmes terrorit, aq më shumë do të jetë i interesuar për të gjetur paqen. Ne duhet ta detyrojmë Rusinë në këtë së bashku”, shton ai.